SHQO ákimi Danıal Ahmetov koronavırýstan saýyǵyp shyqqan ári antıdenesi bar adamdardyń qan plazmasynan jınaqtalǵan bankti 19 qyrkúıekke deıin ashýdy tapsyrdy.
Aımaq basshysy bankte kem degende 1000 doza bolýy kerektigin atap ótti.
«Biz qazan aıyndaǵy koronavırýstyń ekinshi tolqynyna daıyn bolýymyz qajet. Qazirden bastap plazma bankin qurý úshin tıisti jumystardy atqarý kerek. Shyǵys Qazaqstanda 4 409 adam koronavırýstyq ınfeksıamen aýyryp, jazyldy. Ol adamdardyń qan plazmasy arqyly ózge jandardyń aýrýdan saýyǵyp ketýine kómek bere alamyz», - dedi SHQO ákimi Danıal Ahmetov.
Onyń aıtýynsha, plazma bankin qurýǵa jedel túrde kirisý kerek. Búgingi kúni medısınalyq mekemelerdegi bas dárigerler men ákimderdiń basty mindeti - óńir turǵyndaryna qan plazmasyn tapsyrýdyń mańyzyn túsindirý.
Esterińizge sala keteıik, búgingi kúni SHQO-daǵy medısınalyq mekemeler úzdik tehnıkalyq jabdyqtarmen qamtamasyz etilgen. 27 aýrýhana, onyń basym bóligi aýdandyq aýrýhanalarda ortasha eseppen 5 konsentratordan bar ekenin aıta ketken oryndy. Shyǵysqazaqstandyq dárigerlermen COVID-19 kúresýdegi tájirıbelerimen bólisken Tatarstan Respýblıkasynyń dárigerleri bizdiń stasıonarlardyń medısınalyq preparattarmen jabdyqtalýyna oń baǵalaryn berdi.
Aımaq basshysy oblys maýsymdyq aýrýlarǵa daıyn ekenin atap ótti. Máselen, tumaýǵa qarsy vaksına egý jumystaryna daıyndyq júrgizilýde. Oblystaǵy medısınalyq mekemelerge 20 000 vaksına satyp alyp, jetkizý josparlanýda. Tegin vaksına osal toptaǵy turǵyndarǵa salynady.
